2Pe 1 | MMX | STEP | Nenia ne Simon Pita, lasaxaruki la luun pavang at ne Iesu Karisito. La a malagan i na levelinga rinemi limixin miga ruuna xaka lunuunu xeneng at lomokmokso at ne Moroa atnedik, neni Laradi Loklox Arooro ne Iesu Karisito; la mo lunuunu i lox avukat ngan lunuunu atnama.

2 Peter 1

Lavapaase Axasep

1 Nenia ne Simon Pita, lasaxaruki la luun pavang at ne Iesu Karisito.

La a malagan i na levelinga rinemi limixin miga ruuna xaka lunuunu xeneng at lomokmokso at ne Moroa atnedik, neni Laradi Loklox Arooro ne Iesu Karisito; la mo lunuunu i lox avukat ngan lunuunu atnama.

2 La mumu mun lakleklen atnemi xeneng at ne Moroa la ne Iesu Leeme Silok atnedik, a sing do letaba nabalamu eburu mi lenmila na su silok keneng at lorooro atnemi.

Lorotoro La Losoksoxolik At Ne Moroa

3 Lololos at ne Moroa gara raba vam nedik mi levempanga axap nedik dik pakes tin ti lok kaka lorooro avolo la ti ruuna ka luruptuvuk nunuan mumu lakleklen atnedik ti ne Iesu Karisito, mo ga ro xaka nedik kusu atak lox eburu min keneng at lisisixam la luvukat teren. 4 Keneng at na lempanga, neni gara raba vam nedik mi leventamtaba i nunuan aleng, neni ga tong li i rinedik, kusu na leventamtaba naba beng pe nemi basinge levendoxoma xapmek at na lavatkangka la lavavara xapmek, la kusu na leventamtaba naba lam kaka nemi xusu minaba ruuna xaka luruptuvuk nunuan la minak mokso kerekngan neni.

5 Neni lavasuun ba ren la mina lolos tinotno xusu minak lox epasum luvukat ukeneng ti lunuunu atnemi; la minak lok epasum lakleklen ukeneng at luvukat atnemi; 6 la minak lox epasum lavatpas adoxoma at luruptuvuk atnemi ukeneng at lakleklen atnemi; la minak lox epasum lurutu lolos ukeneng at lavatpas adoxoma atnemi; la minak lok epasum lomokmokso ukeneng at lurutu lolos atnemi; 7 la minak lox epasum luvukat ti luvutneton nemi ukeneng ti lomokmokso; la minak lox epasum labalamu ukeneng at luvukat ti luvutneton nemi. 8 Do mina ruuna xaka i na levempanga la dina umsu xeneng at lorooro atnemi, dinaba lok nemi la mina lox asuusu leveloklok nunuan mumu lakleklen atnemi keneng at Leeme Silok atnedik ne Iesu Karisito. 9 Ketla nege do ixo ruuna i na leveloklok nunuan, neni i lok ngan laxatli main no ixo epovo xusu neni na reven la ira domampe nga i do Moroa gara gos adadat pam i basinge laxakapmek teren me gano.

10 Kuren la luvutnetak mi luvurinuk, mina lolos kusu mina doma amuat lorotoro la losoksoxolik at ne Moroa rinemi; la do mina lox i na, kopmen tinotno mi noxo subu basinge lunuunu atnemi. 11 Do mina mu asu na langas, lumusaragu naba rem suang tinotno xusu miba vubeles ukeneng at Linintoo ik lox amisik la neni Linintoo at Laradi Loklox Arooro atnedik, Leeme Silok ne Iesu Karisito.

12 Kuren la nenia anabak lox adoxoma aklen amisik nemi ri na langas, keke i do miraklen pam di la mira tu lolos keneng at luruturun miga ruuna xaka i. 13 Nia a lok do, ik mokso mun tia xusu anak lox axatu levendoxoma atnemi mi na levempanga at na levenaleng nenia move a rooro, 14 atla aklen i do, noxo lox abao la ana on basinge labantuxu at na lavatbung menemen, ngan levelinga at Leeme Silok atdik ne Iesu Karisito ga tong taba ia min. 15 Anaba lolos tinotno xusu ana vuse xaka tangas ti lok nemi xusu minabam doma aklen ti na levempanga at levenaleng melemu at lanmet tarak.

Nema Maga Reven Lisisixam At Ne Moroa

16 Nema ma goxo mumu asu mun tekonterepi gamasa mene nga boro at levendoxoma at limixin at levenaleng maga tong asu Lagale Lavavang tinimi mumu lololos la lovotpot at Leeme Silok atnedik ne Iesu Karisito. Ketla nema maga ven tinotno lisisilok teren mi levengkatli atnema. 17 At loxonaleng ne Moroa ne Temen ga raba i mi laasen silok la lisisixam, nema mo magak lok, la maga ronga laxaka tadi ga laa boro at lisisixam silok ga vaase xeretna,

“Neni na ne Nuruk, a balamu i la a momo min!” ^a

18 La nema xa maga ronga mo laxaka tadi ga ravasu boro vana at laxalibet at loxonaleng nema magak lox eburu min to vana at lakaana xaala.

19 La nema ma nuunu rinotno at levelinga at lavaeme vapaase alii diga paase i. I lox avukat mina ronga ka avukat na levelinga, atla neni naba lok ngan lababao i soosoo at laxanimin la ira se at labarakoxot, la naba lok ngan lavatpentian i soosoo ro xeneng at lorooro atnemi. 20 La pana axap at levempanga axap, minakleklen box i do ixo epovo rinotno xusu tara naba lox asuusu lavasuun at levempapaase alii no xeneng at Lovoang Kaala mi lodoxoma axa ren; 21 atla, kopmen tepempapaase alii ga ravasu mun at lodoxoma mene nga at taradi at na laxangka, ketla lavaeme vapaase alii, diga vonon mumu mene nga Loroonan Kaala at levenaleng diga paase asu levelinga ga laala boro at ne Moroa.